- 14 Jan, 2025
- 0 Comments
- 0 Secs Read
பொங்கல் திருநாள்: தமிழரின் பாரம்பரியப் பெருமை
‘சுழன்றும் ஏர்பின்னது உலகம்’ என்ற வள்ளுவத்தின் வரிகளில், உழவின் சிறப்பு வெளிப்படுகின்றது. பொங்கல் திருநாள், தமிழர் விவசாயப் பண்பாட்டு அடையாளங்களில் ஒன்றாகத் திகழ்கிறது.
ஆய்வாளரான நா. வானமாமலை, பொங்கல் என்பது அறுவடை நாளாகவே கொண்டாடப்பட்டதாகச் சொல்கிறார். காலத்திலிருந்தே இந்த விழாக் கொண்டாடப்பட்டு வருவதாகக் கூறுகிறார். இதற்கு ஆதாரமாக, குறுங்கோழியூர் கிழார் பாடிய புறநானூற்றுப் பாடலைச் சுட்டிக்காட்டுகிறார் வானமாமலை.
நிலத்தை குறிஞ்சி, முல்லை, மருதம், நெய்தல், பாலை எனப் பிரித்த பண்டைய தமிழர்களின் இலக்கியங்கள், மருத நிலத்தில் உழவுத் தொழிலின் தொடக்கத்தையும் அதன் பின்புலத்தில் உருவான பொங்கல் திருவிழாவின் தொடக்கத்தையும் வலியுறுத்துகின்றன.
ஹரப்பா, மொகஞ்சதரோ நாகரிகங்களில் உழவுத் தொழிலுக்குப் பயன்படுத்தப்பட்ட எருதுகள் தமிழர் வளர்ப்பில் தோன்றியவை என்பதை ஆவணங்களால் நிரூபிக்க முடிகிறது. நெய்யும் பாலும் தேனும் கலந்து செய்யப்படும் பொங்கல், பண்டைத் தமிழரின் சமையல் மற்றும் மருத்துவ அறிவின் சான்றாகும்.
வள்ளுவம், தொல்காப்பியம், சிலப்பதிகாரம் போன்ற தொன்மையான இலக்கியங்கள், தமிழர் வாழ்வியல் மற்றும் பொறியியல் அறிவினை வெளிப்படுத்துகின்றன. பொங்கல் விழாவில் கதிரவனுக்கு வணக்கம் செலுத்துவது, தமிழரின் வானியல் அறிவையும், நெற்பயிர்களைப் பாதுகாக்கும் இயற்கை வழிகாட்டுதலையும் காட்டுகிறது.
“தை மாதப் பிறப்பன்று, சூரியன் தனுசு ராசியிலிருந்து மகர ராசியில் பிரவேசிக்கிறான். இதனால் மகர ஸங்கிராந்தி என்று இதற்குப் பெயர். உத்தராயணமும் தொடங்குகிறது. ஆகவே தை மாதப் பிறப்பு பல நூறாண்டுகளாக நமது விசேஷ தினங்களில் ஒன்றாகக் கொண்டாடப்பட்டு வருகிறது” என்று சொல்லும் பேராசிரியர் எஸ். வையாபுரிப்பிள்ளை, ஐங்குறுநூறு உள்ளிட்ட பல இலக்கியங்களில் இடம்பெறும் தை நீராட்டும் அதை ஒட்டியே நடப்பதாகச் சொல்கிறார்.
புறநானூறு மற்றும் ஐங்குறுநூறு போன்ற இலக்கியங்களில் பொங்கல் விழா பற்றிய விரிவான விவரங்கள் காணக்கிடைக்கின்றன. தொல்காப்பியமும் புறநானூறும் தமிழர் வாழ்வியல் கட்டமைப்பில் பொங்கல் கொண்டாட்டத்தின் இடத்தை நிரூபிக்கின்றன.
ஆயிரக்கணக்கான ஆண்டுகளாக தமிழர் வாழ்வியல் மற்றும் பண்பாட்டில் அதிமுக்கியத் திருவிழாவாகப் பொங்கல் காணப்படுகிறது. இதன் வழியாக, தமிழர் அறிவியல், மருத்துவம், பாரம்பரியம் மற்றும் பண்பாடு ஆகியவை ஒருங்கிணைந்து வெளிப்படுகின்றன.